Portrett í anda Andy Warhol

Aldur – bekkur

7.-8. bekkur

Tími

2×80 mín. kennslustundir

Kveikja

Byrjað er á að ræða um popplist og einkenni hennar með hjálp síðunnar um Popplist á myndmenntavefnum.

Því næst er hugtakið portrett úrskýrt og skoðuð portrett eftir Andy Warhol. Rætt er um silkiþrykk aðferðina sem Warhol notaði við gerð myndanna og hvernig sú tækni gerði honum mögulegt að gera mörg eintök af sömu myndinni en í mismunandi litum.

Svo er farið í gegnum aðferð til að teikna höfuð og andlit „réttum“ hlutföllum. Réttum er í gæsalöppum þar sem engin tvö andlit eru eins og hlutföll geta verið mismunandi þó nota megi vissar grunnreglur til viðmiðunar. En sú algengasta er sýnd skref fyrir skref hér fyrir neðan og  í meðfylgjandi glærusýningu.

Framkvæmd

Nemendur vinna verkefnið eftir verklýsingunni hér fyrir neðan eða í meðfylgjandi glærusýningu.

7b_popp_andlit-hlutf (1)1. skref
Teiknið ferning sem
er 16 cm á breidd og
16 cm á lengd.
(glæra 2)

7b_popp_andlit-hlutf (2)2. skref
Teiknið ferhyrning sem er 8 cm á breidd og 12 cm á hæð.
Allar línur sem sýndar eru í rauðu skal teikna mjög
laust því þetta eru hjálparlínur.
(glæra 3)

7b_popp_andlit-hlutf (3)3. skref
Skiptið
ferhyrningnum
í 2 jafna helminga.
(glæra 4)

7b_popp_andlit-hlutf (4)4. skref
Teiknið egglaga höfuð
sem er breiðara
að ofan en neðan.
(glæra 5)

7b_popp_andlit-hlutf (5)5. skref
Teiknið hjálparlínu fyrir
hárlínuna u.þ.b. 1,5 cm frá hvirfli
(1/8 hluti af 12cm).
(glæra 6)

7b_popp_andlit-hlutf (6)6. skref
Skiptið bilinu frá hárlínunni
og niður að höku í 3 jafna hluta (3,5 cm)
með 2 hjálparlínum.
(glæra 7)

7b_popp_andlit-hlutf (7)7. skref
Til að finna stærð og staðsetningu
augnanna er breidd höfuðsins
skipt í 5 jafna hluta (1,6 cm hver hluti).
(glæra 8 )

7b_popp_andlit-hlutf (8)8. skref
Teiknið augu og augabrúnir. Munið eftir augnkrókunum og augnlokunum. Augu eru oftast möndlulaga og augnhárin oft meira áberandi hjá konum. Augabrúnir eru oft þykkari á körlum en konum og geta verið mismunandi í laginu. (glæra 9)

7b_popp_andlit-hlutf (9)9. skref
Teiknið nefið. Breidd nefsins milli nasavængjanna er oft miðuð við breidd bilsins milli augnanna.Nef eru að sjálfsögðu mjög mismunandi að stærð og lögun og því er besta leiðin til að teikna nef að fá sér spegil og æfa sig á eigin nefi eða skoða myndir og herma eftir þeim. (glæra 10).

7b_popp_andlit-hlutf (10)10. skref
Teiknið eyrun. Stærð eyrna er einstaklingsbundin en þau eru samt sem áður staðsett á ákveðnum stað. Þau ná frá augabrúnum eða efri brún augna og niður að neðri brún nefsins. Passið bara að teikna þau ekki of útstæð. Eyru virðast frekar flókin og gott að nota fyrirmyndir til að skoða lögun og gerð. (glæra 11).

7b_popp_andlit-hlutf (11)11. skref
Teiknið munninn. Breidd munnsins er oftast miðuð við breidd bilsins milli augasteinanna. Bilið milli efri varar og höku er oftast 1/4 af heildarstærð höfuðsins.
(glæra 12).

7b_popp_andlit-hlutf (12)12. skref
Teiknið hárið, hálsinn, axlirnar (og peysu eða bol?). Hárið getur verið sítt eða stutt, krullað eða slétt, allt eftir smekk. Hálsinn er oftast breiðari á karlmönnum en kvenmönnum.
(glæra 13).

7b_popp_andlit-hlutf (13)13. skref
Farið nú ofan í allar línur (nema hjálparlínur) með grönnum svörtum túss. Stokið síðan út allar blýantslínur. Ljósritið myndina í 4 eintökum (eða 5 því gott er að hafa 1 eintak til vara).
(glæra 14).

7b_popp_andlit-hlutf (14)14. skref
Veljið 4 liti (tré- eða tússliti) og litið mismunandi hluta andlitsins og bakgrunninn með hverjum lit. Til að auðvelda sér vinnuna er hægt að búa til töflu eins og sést á meðfylgjandi mynd. (glæra 15)

7b_popp_andlit-hlutf (15)15. skref
Að lokum eru
myndirnar klipptar út
og límdar á karton (t.d. svart).
(glæra 16)

Myndir – mynddæmi

Warhol-Monroe
Marilyn Set

eftir
Andy Warhol.
Mynd af vef
Joseph K. Levene Fine Art, Ltd.


Mao set of 10
eftir Andy Warhol.
Mynd af vef
Joseph K. Levene Fine Art, Ltd.

Andy Warhol. Self-Portrait. 1966
Self Portrait

eftir Andy Warhol.
Mynd af MoMa.

lsdfæsdf

Tengt efni

Markmið – áhersla

7. bekkur:

Nemendur:

  • vinni skissur með áherslu á hvernig form, litir og myndbygging geta undirstrikað ákveðna þætti eða boðskap myndverks, t.d. með því að raða sömu formum upp á mismunandi vegu
  • þekki og geti fjallað um popplist og skoði mynddæmi af verkum sem unnin eru í þeim anda
  • þekki og geti fjallað um mynddæmi sem sýni hvernig popplistamenn taka til meðferðar myndmál neysluþjóðfélags og fjölmiðlunar, t.d. myndasögur, auglýsingar, kvikmyndir, bæði á jákvæðan og neikvæðan hátt
  • þekki hugtakið fjölfelldi og a.m.k. eina grafíska aðferð, t.d. dúkristu

8. bekkur:

Nemendur:

  • þekki hlutföll mannslíkamans (andlits)
  • vinni mynd af andliti og mannslíkamanum í tvívídd og þrívídd

Undirbúningur

  • Finna til mynddæmi, efni og áhöld í verkefnið

Efni – áhöld – hjálpargögn

  • Andlit skref fyrir skref – Glærusýning
  • A4 pappír
  • Vel yddaðir blýantar og strokleður
  • Reglustika
  • Grannur túss ( t.d. Artline 210 nr. 0,6 eða Artline 200 nr. 0,4)
  • Litir (t.d. tré-, túss- eða vaxlitir)

Nafn sendanda

Sigrún Ólafsdóttir

Skóli

Borgaskóli

Gefðu verkefninu einkunn:

[ratings]


Athugasemdir

Skrifaðu athugasemd