Lýsing

Sníkjuvespur tilheyra æðvængjum en eru ekki sérlega skyldar geitungum eða hunangsflugum. Þær eru afar mjóslegnar og sérstaklega er áberandi hve mittismjóar þær eru. Íslenskar sníkjuvespur eru flestar svartar á lit, stundum eru áberandi rauðar rendur á fótunum. Flestar eru mjög smávaxnar og lítt áberandi.

Búsvæði

Sníkjuvespur eru algengar í margs konar gróðurlendi, einkum þar sem fjöldi annarra skordýra fyrirfinnst. Á Íslandi eru þó nokkuð margar tegundir sníkjuvespa en þær algengustu kallast sledduvespur og finnast einkum í graslendi, svo sem í úthaga.

Fæða

Sníkjuvespur bera nafn með rentu því þær verpa eggjum sínum í lirfur annarra skordýra svo sem fiðrilda. Þegar lirfur sníkjuvespu koma úr egginu lifa þær á vefjum hýsilsins og púpa sig þar. Þegar þær klekjast út drepst hýsilinn.