Silene acaulis

Lýsing

Blöð eru striklaga, sitja í hvirfingu, hærð á röndum. Upp af djúpstæðri stólparót, holtarótinni, vaxa margir stönglar þétt saman og verða að þybbnum, hvelfdum þúfum eða flötum gróðurtorfum.

Hver stöngull ber eitt blóm, þau eru einstök í blaðöxlum, nærri legglaus. Oft má sjá þrjár mismunandi gerðir blóma í sömu þúfu: Tvíkynja blóm eru stærst og fagur-rósrauð; karlblóm eru nærri eins stór, ber mikið á 10 rjómagulum fræflum en á stundum sér í óþroskaða frævu; kvenblóm eru minnst og fölbleik á lit. Þau þekkjast á þremur löngum, S-beygðum stílum.

Nytjar

Holtarætur, öðru nafni harðseigjur eða harðsægjur, þóttu mesta toræti nema þær væru vel soðnar. Til er máltæki: Flest er það matur sem í magann kemst nema holtarótin óseydd.

Einnig má steikja þær á pönnu í smjöri og hafa með öðrum mat.