Markmið

Að kanna tengslin milli þeirra mörgu mismunandi þátta sem stuðla að fátækt. Nemendur eru hvattir til að íhuga leiðir til þess að rjúfa vítahring fátæktar.

Efni og gögn

Fyrir hvern fjögurra manna hóp þarf stórt pappírsblað, lím, penna og sett af útklipptum Rjúfum vítahring fátæktar-miðum.

Aðferð

1. skref

Nemendur mynda saman fjögurra manna hópa. Saman lesa þeir sett af Rjúfum vítahring fátæktar miðum. Því næst raða þeir miðunum í hring á pappaspjald. Miðinn sem á stendur „Fátækt“ ætti að vera efst í hringnum og ættu hinir miðarnir að fylgja þar á eftir í hring réttsælis. Skipan hringsins ætti að sýna hvernig aðstæðurnar leiða hver af annarri.

Þegar hópurinn hefur komið sér saman um niðurröðunina líma nemendur miðana á pappaspjald og teikna örvar frá hverjum miða til þess næsta.

2. skref

Hóparnir ræða nú til hvaða aðgerða þyrfti að grípa til þess að rjúfa vítahring fátæktar. Mögulegar aðgerðir gætu falið í sér að: búa til áætlun þar sem nemendum sem búa við fátækt er útvegað fæði, að veita heilsugæsluþjónustu fyrir fátæka, að veita meira fjármagn til menntunar á tekjulágum svæðum, að setja upp fullorðinsfræðslu og vinnuþjálfun.

3. skref

Þegar nemendur hafa ákveðið leið til þess að grípa inn í aðstæðurnar, ættu þeir að skrifa stutta greinargerð um aðgerðir. Greinargerðina er síðan hægt að líma til hliðar við tilheyrandi skref í Vítahring fátæktar. Því næst ákveða nemendurnir næstu skref í aðgerðinni og skrifa um þau og sýna fram á hvernig þessi aðgerð mun hafa áhrif á fátæktarvítahringinn.

4. skref

Þegar allir hóparnir hafa lokið sínu verkefni ganga nemendur um skólastofuna og skoða verkin hjá hinum. Bekkurinn ræðir því næst saman eftirtaldar spurningar:

• Nefnið nokkra þætti sem stuðla að fátækt. Koma fleiri þættir við sögu en koma fram á Fátæktarvítahrings-spjöldunum?
• Hvers vegna leiðist fátækt oft út í slíkan vítahring?
• Hvaða aðgerðir lagði hópurinn ykkar til við að brjóta vítahringinn upp?
• Er ein íhlutun nóg til þess að rjúfa vítahringinn eða þarf margs konar inngrip til þess að það sé mögulegt?Hverri af aðgerðartillögunum væri auðveldast að hrinda í framkvæmd?
• Hvað er nauðsynlegt til þess að þessar aðgerðir verði að raunveruleika?
• Veistu um einhver svipuð verkefni sem verið er að hrinda í framkvæmd í þínu landi eða öðrum löndum?

Kennarinn ætti að tryggja að nemendur skilji að vítahringur fátæktar fyrirfinnist ekki einungis í þróunarlöndunum, heldur einnig í öðrum löndum.

Tilbrigði

Nemendur leika eða skrifa sögur um skref vítahringsins og hvernig unnt er að rjúfa hann.

Verkefninu fylgt eftir

Nemendur safna blaðagreinum sem sýna dæmi um hvernig vítahringur fátæktar hefur verið rofinn í löndum heimsins.

Tengsl við námskrá

Verkefni þetta útheimtir að nemendur læri samvinnu, skipulagningu og að sjá fyrir afleiðingar. Verkefnið væri hentugt í samfélagsfræðitíma.